Shirika la Centre for Community Initiatives (CCI) linavunia kushiriki katika Mkutano wa Nne wa Kimataifa wa Shirika la Hali ya Hewa Duniani (WMO) kuhusu Utabiri wa hali ya hewa na mabadiliko Tabianchi, uliofanyika Arusha, Tanzania. Mkutano huu uliwakutanisha wataalamu wa tabianchi, wanasayansi, watafiti, watendaji wa maendeleo, na wadau mbalimbali kutoka maeneo tofauti kwa lengo la kubadilishana uzoefu na kuimarisha matumizi ya taarifa za tabianchi katika kufanya maamuzi na kujenga ustahimilivu wa jamii.

Mkutano huu ulitoa fursa muhimu ya kubadilishana maarifa, kuimarisha ushirikiano kati ya wadau, na kujadili mbinu bunifu za kuboresha utabiri wa tabianchi na utoaji wa huduma za taarifa za tabianchi zinazokidhi mahitaji halisi ya jamii.

Katika mkutano huo, CCI iliwasilisha kazi zake zinazoendelea katika kuimarisha ustahimilivu wa jamii dhidi ya mabadiliko ya tabianchi na kuendeleza mikakati ya kukabiliana na athari za tabianchi inayoongozwa na jamii nchini Tanzania.

CCI iliwasilisha matokeo ya tafiti kuhusu Upimaji wa joto na uhusiano kati ya matumizi ya nishati kwa ajili ya kupikia na athari za joto kali ikieleza changamoto zinazokabili jamii zinazoishi katika makazi yasiyo rasmi. Matokeo hayo yalionesha umuhimu wa kutumia ushahidi unaotokana na jamii ili kuelewa vizuri athari za joto kali na kusaidia kubuni mikakati jumuishi na inayozingatia mazingira halisi ya jamii katika kukabiliana na mabadiliko ya tabianchi.

Aidha, CCI ilishirikisha maendeleo ya Mradi wa DARAJA, unaolenga kuboresha upatikanaji na matumizi ya taarifa za hali ya hewa na mabadiliko ya tabianchi kwa jamii. Kupitia mradi huu, CCI inaendelea kuimarisha matumizi ya huduma za hali ya hewa, mifumo ya tahadhari za mapema, na kuwawezesha makundi yaliyo katika hatari zaidi ikiwemo wanajamii waishio katika makazi yasiyopimwa, wakulima, wavuvi, wafugaji na wajasiriamali wadogo kufanya maamuzi sahihi na kujiandaa vizuri dhidi ya athari za mabadiliko ya hali ya hewa ma tabianchi.

Ushiriki wa CCI katika mkutano huu unaendelea kuimarisha dhamira yake ya kushirikiana na wadau mbalimbali katika kuhakikisha taarifa za tabianchi zinapatikana kwa urahisi, kujenga ustahimilivu wa jamii, na kukuza suluhisho endelevu katika kukabiliana na mabadiliko ya tabianchi.